Albòm K-Dilack ak Bedjine : “Keep it hard” se paradòks yon fanm fontèn

“Keep it hard”, ki se 14èm mòso sou albòm Bedjine ak K-Dilack la se yon pwopozisyon ki chaje ak paradòks. Epi fanm ki asime mesaj la sanble tèt koupe ak yon fanm fontèn. Nou pale de paradòks pou n defini yon pwopozisyon ki chaje ak kontradiksyon. Se tankou, sa w tande atis la di a, se lekontrè a li di. Moun ki fè pwofesyon ekri itilize paradòks ak anpil lòt figi atenyasyon pou maske oswa pou diminye efè lide yo a sou nou menm ka resevwa mizik la. Anplis, yo di yon fanm, se yon fanm ki ejakile tankou li t ap pipi. Se pa pou san rezon, anpil atis toujou itilize tèm lapli pou pale de jwisans fanm. Nou gen egzanp : fè l fè lapli (Mikaben ak Kenny Haiti) ; cheri benyen m (Harmonick), Lapli pa tonbe kijan w fè antre (Koupe Cloué).

Pawolye ki ekri mòso « Keep it hard” la itilize chan leksikal “lapli” pou pwodui zèv sila. Ladan li nou relve kèk tèm tankou lapli, nyaj gri, lanati, tan maske, parapli, inonde, neye, loraj, sezon dete…

Premye konpreyansyon nou ka genyen sou mizik sila, sèke nou tande yon fi k ap di patnè li, kite lapli a tonbe, fason tan an mare la a, si w ale w ap mouye (menm si w ta gen parapli). Se tankou, misye pa vle dòmi, li vle ale lakay li avan lapli bare li. Epi dam lan di l, depi lapli a pete, kapab gen inondasyon. Rete dòmi ak mwen ankò aswè a. Se senp, se sa nou petèt ta ka wè selon fason nou oryante konpreyansyon nou.

Ann vire nan lòt bò a, nan fen fon tèks la. Nan imajinasyon pawolye ki konpoze tèks la, kisa li eksprime egzateman ? Mizik la pati konsa “Keep it hard baby, ou mèt kite l tonbe / kite m ba w yon gwo lapli / don’t go baby”. Nou imajine yon fanm ki sou plezi l, ki sou wout po l rive sou sa Darline Desca rele Pik makaya epi misye vle kanpe sou kous la. Se moman an dam lan di misye, kenbe la, poko lage, kenbe la pou m ka benyen (kite m ba w yon gwo lapli).

« Pa gen anyen ki ka kanpe loraj lè l ap gwonde, tout katye a ap tande »  selon mwen menm pwopozisyon sa pa kadre ak premye lide yo kote l t ap mande misye pou kenbe djanm pou l ka ba li lapli. Epi aprè li di li, anyen p ap ka kanpe li lè l ap gwonde. Eske sa ta vle di, zanmi an pa t gen lide kanpe sou plezi a vre oswa lide di misye kenbe la a, s on fason pou sansibilize misye pou rete di kou bout bwa. Mwen pa kwè ak dezyèm lide a, mwen plis wè misye te vle retire li, epi li di misye, ou mèt kite l tonbe,mwen menm tou, m ap ba w yon gwo lapli. Pou mwen menm, pasaj sa mande ranje paske zanmi an te sou kanpe pandan li ap gwonde.

« Lapli tonbe menm sezon dete / Lè nyaj gri, lè tan maske, se lanati k pwal deraye, lè lapli pwal tonbe, menm parapli paka anpeche w mouye » se tankou pawolye a ta di zanmi an, pa gen sezon fiks pou n jwi. Epi depi w wè nou la a nan chanm sa a, se lapli nou pwal fè. E lè lapli pa m la nap tonbe, menm si w met kapòt, w ap mouye kanmenm (fanm fontèn).

“I need a night again”, mwen bezwen yon nwit aswè a ankò met gason sou ou piti. “Keep it hard” se ekspresyon yon fanm fontèn, yon fanm ki renmen jwi epi ki pa negosye plezi sèks li. Keep it hard” te ka sanble ak “kle kou” malerezman premye a se jwisans ak ògas lòt la se jwisans, soufrans ak ògas.

Sa nou dwe konnen sou kesyon fanm fontèn lan, seksològ yo di, tout fanm nèt fontèn, men tout gendwa pa ejakile tankou y ap pipi, sa depan de moman y ap fè l la, kote y ap fè l la ak moun y ap fè l la.