Bedjine ak K-Dilack vini ak yon misyon tou akonpli

Aprè tout bèl gòl ekip Bedjine K-Dilack fè nan biznis mizik lan soti nan “fo pwomès” nan lane 2019, pou rive nan “move chofè” ke yo te pwopoze nan lane 2023 a, mesyedam yo pa deside desann tèren an. Se pa tante y ap tante soti pou wè sa lari a ap bay men pito, se gòl yo vin fè.
« Misyon akonpli » se tit premye albòm mesyedam yo apre 5 lane kolaborasyon. « Misyon akonpli » se 16 mizik ak 16 listwa diferan. Albòm sila se dlo pou pase swaf tout fanatik ki te enpasyan yo epi tout se yon grenn eskalye anplis nan mach konpa Ayiti a. K-Dilack chante 5 mizik pou kont li sou albòm lan ( lakay granmoun gen lòd / Denye konba / Tremblement de coeur / Woulib / Ou gou) epi Bedjine chante 3 pou kont li (Like you do / M ap ret ak tèt mwen / Keep it hard).

Albòm sa a, s on albòm 100% konpa apre premye tit mizik la “Lakay granmoun gen lòd » ki ofri yon pèspektiv diferan, tout rès mizik yo se konpa. Kèk fwa nou jwenn yon konpa slow/love, lòt fwa nou jwenn konpa manba ak konpa dirèk. Apre maryaj vokal 2 atis yo, amonizasyon enstriman yo ak ti touch patikilye anba anba swa nan gita oswa nan keyboard, se ansanm eleman ki fè pwa albòm lan sou plan mizikal. Mwen pa sèten n ap jwenn yon mizik ak eslogan sou albòm lan pou fè lari a, petèt, nou ta dwe kite tan an di nou plis sinon, de pawòl tankou « Met rido » ak “Ou jwe w pa ganye” te ka tounen de slogan pou moun tire toya.

Ak yon ti rezime tou kout, n ap prezante w 16 mizik yo youn apre lòt. Pa bliye, nou chak resevwa mizik yo fason pa nou, selon konpreyansyon nou ak nivo apresyasyon nou. Lè w fin li atik sila a, sonje fè pa w la.

• Lakay granmoun gen lòd : Atis la pwopoze yon mòso pou salouwe lakou lakay li, pou tire pwen pou eksprime rekonesans li tou pou tout sa li benefisye kòm sekirite. Nouu pa konnen pou kisa atis la pa pwopoze yon rit ki plis tradisyonèl tankou rit rasin yo (kongo, ibo, nago, ti joslin, manniba…). N ap dakò, gen kèk ane atis vodou yo komanse fè lòt pwopozisyon rit pou chante pawòl mistik yo. “Lakay granmoun gen lòd / Pinga panse ou kapab antre san w pa di lonè”.

• Prefere : Sa s on siwo dòja. S on konpa, wi, s on mòso konpa. G on kote m panse se yon mizik evanjelik lè atis la ap di “Mwen prefere pou mwen viv avè w / olye pou mwen ta mouri san ou”. S on lanmou fò, yon lanmou majik « Lanmou nou pa avyon men l moute wo pase etwal yo ». Mizik sa, se sèten, l ap jwenn tikè lari a. Pa gen gwo dout sou sa. Solo keyboard tèt chaje menm si se menm rejis kouran an, pa gen twòp inovasyon ak pwopozisyon apre melodi chan an ki nèf.

• Konsekans : Youn nan bèl gòl sou albòm lan. Lari a deja valide l. Videyo sa soti avan menm albòm lan pran lari. Plis pase yon milyon moun gade li sou youtube nan yon sèl jou a. Bedjine a K-Dilack tounen yon fenomèn nan biznis mizik la nan peyi a. Mòso sa s on entwospeksyon kolektif ki mennen a yon priz konsyans. Se yon koup ki tonbe nan pyèj yon bann diskisyon san sans kote ego yo pi wo pase larezon yo. Nan koregrafi videyo a, koup la tèlman diskite, yo menm arrive aksidante e menm rive al bwa chat pandan yo kite timoun dèyè. S on gwo leson pou moun k ap fè relasyon epi ki pase tout tan yo nan anrichi diskisyon, atis yo ede n antisipe degas a kapab koze sou lavi nou ak lavi pwòch nou yo.

• M ap ret ak tèt mwen : Mwen renmen tande mizik rezilyans fanm. Si m ta vle fè referans entètekstyalite mwen te ka pran mizik « M p ap mouri .- Rutshelle » ak « M ka jwenn yon lòt .- Vanessa Desiré ». Se yon modèl ripti ak ledikasyon fanm lakay nou resevwa pou akepte soufri nan relasyon menm si gason ap triminen yo. Mizik la eksprime yon konfyans anraje lè atis la di « Tan m ta ret ap swiv ou / M pito swiv lobraj mwen ; Si lanmou fè m tounen yon bèt fewòs / m ap ret viv nan kaj mwen ; Nivo m renmen tèt mwen depase simbi ; Rezon lavi pwal fè w wè siksè lavi m nan chak ekriti ». Mizik sa gen inovasyon ak pwopozisyon konparativman ak premye a. Entwo mizik la ak deroulan refren an, gita a ap f on travay ekstrawòdinè. Gen imaj ak figi estil nan tèks la ki enteresan e ke anpil moun pwal itilize pou pale ak blofè k ap brize kè yo.

• Met rido : Se prefere m sou albòm lan. S on fason pou n konprann malre nivo objektivite, moun k ap ekri atik la rete yon mou nak santiman. Met rido se yon envitasyon ak diskresyon pou pwoteje entimite. Met rido se ekspresyon rezilyans. Pou w viv nan lavi fòk ou entèlijan. Lyonel Trouillot di nan kòmansman liv « du domaine de la tolerance », nan lavi se swa tout moun fè yoga oswa nou reziye n nou mache toutouni. S on fason pou m di w, pa gen relasyon ki pa gen pwoblèm pa yo. Men, si w ka wè yo bèl, se paske y ap fè yoga. Yo kache peche yo. Yo pwoteje enpèfeksyon yo. « Se pa kè m pa genyen si w wè m pa plenyen / Pandan anndanm ap senyen ». Nan kesyon met rido a, m ap pwofite evite medam yo pou leve rido sou vyòl, asèlman ak vyolans konjigal. Pa pwoteje okenn bouwo. Mizik sila, se yon bon konpa manba. G on pati kote keyboard la te sanble tèt koupe ak touch « Zèklè » nan mizik « pito n pa t zanmi ».

• Woulib : Mizik sa se yon demand sèks. Atis la itilize chan leksikal ki lye ak transpò pou ateri ak sa l anvi di fi a pou mande l fè bagay epi pwofite fè vant pou virilite li. Moun k ap mande a swete jwenn inikman plezi pou yon ti tan e li sèmante, li p ap pale. Mizik sila ale nan sans pwopozisyon enstrimantal Roody Rood Boy yo. Se pa yon konpa toukou. S on konpa ranpli. Se K-Dilack pou kont li ki chante mizik sa a.

• Like you do : S on bèl prestasyon vokalik sou yon mizik slow. Mizik sa banm dwa di “Bedjine te ka gen yon bèl karyè nan estill mizik sila. Mizik sa s on fè wè ki gen sans. Petèt s on mizik anpil jèn k ap chante kapab chwazi al entèprete nan maryaj.

• Commando : Mizik sila sanble kontinite mizik “konsekans” lan. Tandans lan pa diferan sou fòm ekspresyon. De moun damou k ap fè elòj pou diskisyon yo ak twoma youn ap bay lòt chak jou. « Pouvwa lanmou sa fè nou deraye / Pouvwa lanmou sa s on fim karate ».

• Dènye konba : Ou ta di se fen listwa « Konsekans » ak « Commando » a. Sofke la, se kri yon moun ki fatige nan goumen ak relasyon. S on kri dezespwa. “Lanmou fini avè m tankou moun ki pa tèm / Lanmou fin trip ak kè m li toufonnen mwen / Gad yon kout pye anba kè m, lanmou sanble l pa patnè m”. Gen mizik, gen mizik. Mwen pa bezwen fè pleyonas.

• Diffamation : Mizik sa ap mete an valè chwa yon patnè ke anpil moun pa t vle wè. “Fanm nou te konn neglije a / Jodi a se li ki madanm mwen ». Se ekspresyon konba kont opinyon ak difamasyon lòt moun ap fè sou relasyon yo an tou.

• Twofe m : Mizik sa, se sèten fanatik konpa ap renmen l. W a konn se Dener Ceide ki travay enstrimantal la. Pwopozisyon an majistral. Kuiv, tanbou, batri, gita ak keyboard se tèt chaje. Jourbite se petèt konpozitè mòso sa a ebyen, gwo chapo pou li. Anpil orijinalite nan konpozisyon an. Tèks la motivan pou moun k ap batay epi ki vle rive. S on ankourajman pou nou fè sa n ka fè, pou pa kite mon pouse nou a leksè « Tout sa m possède se twofe m ».

• Fanm trantèn : S on reprezantasyon sosyolojik sou fason nou wè fanm trantèn an Ayiti. G on zanmi m ki te di yon frè, si w pran yon fanm nan trantèn, li ta dwe peye w. Mizik sa ap eseye diminye vye pèsepsyon sa yo ak yon tèks enklizif. « Se pa yon kesyon de laj / Se pa yon kesyon imaj / Depi l gen matirite, l ap g on gran entansite ».

• Tremblement de cœur : Kri kè brize k ap chante. Se vwa yon reskape lanmou k ap pale. Lolllllll. S on mizik ki destine ak tout plenyadò. Moun patnè lage nan vilnerabilite, depresyon ak bouch pa gou. Yon bèl pwopozisyon ankò menm si n ap kontinye repete menm jan n te di l nan mizik prefere a, ou santi se menm solo keyboard yo. G on bèl inovasyon nan mach mizik la ki majik men solo a pa nouvo pou mwen ditou.

• Keep it hard : Eske se pa dezyèm mizik mwen pi renmen sou albòm lan. Se tankou Bedjine di zanmi an, kite move tan an pase sou nou, n ap enjoy lanmou nou nenpòt jan sa ye. “Kite l tonbe, kite m ba w yon bo lapli, don’t go baby”, “I need a night again”. Lapli a pa senbolize move tan sèlman pou mwen men tou, plezi a ki pwal bay dlo epi Bedjine di zanmi an, depi w ap rive nan nivo sa a, ou pa bezwen retire l paske ak raj w ap ale la a, menm parapli p ap ka anpeche nou mouye. Mizik sila chaje paradòks. Timoun li granmoun konprann.

• Tounen lakay mwen : Nostalji pa dous. Sitou lè w kite madanm ak pitit nan peyi w. Si Klass te lye nostalji pa yo a ak ensekirite, pa zafèm an ak lanmou ebyen K-Dilack ak Bedjine fè pa yo a baze plis sou tout sa peyi a ofri kòm gou. Solèy peyi a, pistach griye, Miragwàn…

• Ou gou : Sou paj sila, nou te deja ekri analiz nou sou mizik sa ki te anonse albòm lan. Pou rapèl, mizik sa, se yon fason pou atis la fè filalang ak tout nèg ki anvi pran bedjine nan men li. Nou konn tout refleksyon se te sisite sou twal yo. Mwen felisite atis la pou enpak li kreye nan kominote a ak tit sila. Plis mizik ou sisite refleksyon ideyolojik, se plis ou pa rèt enpòtan nan kominote a. An reyalite, nou wè, nou konprann…nou jije epi nou sanksyone.