Berto bèl plezi louvri yon restoran Sen Domeng, “Lamanjay”

Depi kèk tan boulvèsman nan peyi Dayiti lakòz anpil nan atis nou yo pran wout kay vwazen pou yal mennen aktivite yo epi fè envestisman. Sa ki pa diferan pou Roberto Pierre Paul nou tout konnen sou non Berto bèl plezi kòm mizisyen.

Jou ki te 3 septanm 2021 an, Berto louvri pòt yon restoran nan Santyago nan lakou Repiblik Dominikèn. “Lamanjay”, yon mo ki te toujou atire atansyon mizisyen an nan bon sans lan depi l ti moun, se non restoran sila. 

Daprè Berto, se opòtinite ak ouvèti ki genyen pou envestisè vin fè biznis ki pouse l Sen Domeng. << Mwen te kòmanse nan imobilye kounye a mwen travèse nan restorasyon paske biznis sa toujou gen demann sitou lè espas ou pwòp, manje w bon epi w gen bon jan sèvis pou kliyan yo>>. Sa ki pa manke nan “Lamanjay” si nou kwè pawòl chantè bèl plezi a.

“Lamanjay” gen yon bèl espas ki ka kenbe nenpòt 300 moun e pèmèt 14 moun jwenn yon kote pou yo degaje yo. Restoran sa sible tout moun alawonnbadè e lap kenbe identite l ak bon jan manje kreyòl yon mannyè pou bay pwodui lakay nou valè.

Berto konte kontinye envesti nan lòt domèn toujou sa kap pèmèt li bay anpil ayisyen ak Dominiken travay, menm si kè l ap dechire lè l wè se pa lakay li lap fè tout envestisman sa yo daprè sa li di nou: << Ayiti se lakay mwen, kè m lou lè m gade map fè modèl envestisman sa yo nan lòt peyi e mwen pa ka fè l lakay mwen pou rezon ensekirite, sa deranje m anpil men mwen rete kwè yon jou tout pitit peyi a ap ka envesti lakay li>>.

Gbsainthubin@gmail.com  | @guigui_landy