Dezyèm Edisyon gala “Soirée Des Amis” nan Margate Event Center

Onore yon moun se youn nan pi bèl bagay moun sa ta ka viv pandan egzistans li, malerezman sa yo pa fèt souvan. Anpil fwa, nou fè sa lè moun sa yo pa la ankò. Se vre li fè fyète paran ak zanmi moun sa a men se pa menm bagay ak lè li prezan. Konsa tou, gen moun ki pa janm jwenn lonè a ni nan vivan ni nan lanmò.

Samdi ki te 21 septanm 2024 la, Hugo Lafrance, Linda Tatoute ak Fusion live te òganize dezyèm edisyon gala “soirée des amis” nan lokal Margate Event Center. Sware sa a te dedye espesyalman ak plizyè moun ki make kominote a pozitivman sitou nan domèn medya a. Pami moun sa yo, nou te jwenn: LUCKNER DÉSIR alyas LOUKO DÉSIR, MARIE PAUL WOODON, WILFRID PETIT FRÈRE, RODNEY NOEL epi  JENEL CECIBON.

Moun sa yo se kèk pami sila yo ki fè anpil bagay nan domèn nan e ki kontinye ap frape pi rèd toujou. Travay sa yo merite anpil lonè ak respè.

Bay valè ak yon valè se yon bagay ekstraòdinè. Se yon jès pou, non sèlman, remèsye moun nan pou travay remakab lap fè a men tou bay moun sa a ankourajman e di yon lòt kap fè yon travay pozitif nan sosyete a kontinye menm si se pa ta nan menm domèn nan.

Nan sak cho, ayè lendi 23 septanm lan, Guy Wewe, yon moun kap fè anpil bèl travay nan kominote a tou, te felisite piblikman kolaboratè li Wilfrid Petit Frère pou chimen li rive fè ak Konpaevents. Guy se youn nan moun ki te gen chans viv ak 2 nawè l tout kalamite Wilfrid te pase pou l rive kote l ye la a jodi a.

Anpil nan nou ta swete onore yon moun pou yon bagay li reyalize ki make nou. Nou pa  oblije gen yon twofe pou n bay men fè l santi sa nan jan nou sipòte l yon fason ou yon lòt. Jan PDG Konpaevents lan renmen di l << pa joure pou yon moun nou renmen travay li men pito sipòte l jan w kapab >>. Bravo ak chak grenn moun sa yo ki te jwenn yon plak donè nan gala “soirée des amis” ki te fèt pou te onore yo e bravo tou a chak grenn moun kap fè yon travay pozitif pou avansman kominote a.

Gbsainthubin@gmail.com
Konpaevents