Gazzman Fete 22/22 Live ak Guywewe !

Gazzman Pierre ke anpil moun sitou konnen sou non atis li Gazzman Couleur te nan emisyon Guy Wewe ayè 22 dawout 2024 nan okazyon 22/22. Se youn nan dat ki make konsomatè Compas direct jenerasyon 2000 lan paske li bay nesans ak 2 nan lejann ke jenerasyon sa janm konnen, Arly Lariviere ak Gazzman li menm. Se okazyon tou Bernier Sylvain, jounalis vedèt ke anpil moun konnen sou non BS oubyen Bawon Samdi, te itilize pou òganize yon kokennchenn bal nan lane 2002 pou selebre 2 mesye sa yo. Yon sware ki ta pral mete fas a fas diyo sa ki tap krache dife nan Nulook ak Zenglen yon lòt gwoup mizikal ki tap mennen nan epòk sa.

<< Sware sa te tèlman cho nan menm 48 tè aprè yon apèl de Big Family ki te dim li pap ka janm vle fèl la, se Zenglen-Nulook poul ye…mwen te oblije fe chak jazz jwe 4 mizik pou bay lot la jiskaske bal fini》, Bernier Sylvain deklare nan mikwo jounalis Guy Wewe Radio a. Yon fèt ki ta pral jwe pòt fèmen e se pi gwo bal ke BS esplike li fe nan lavil. Sa ki ta pral lakoz ke lòt pwomotè vin kenbe tradisyon sa malgre ke Bawon Samedi te kite peyi a fen 2003.

Se te nan yon bèl anbyans ke Guy Wewe te resevwa atis la e envite li pale de orijin li. Lidè Disip la esplike ke li fèt Gonayiv e lè li tap grandi aspirasyonl se te pou jwe foutbòl. Malerezman pou li, yon pwoblèm jenou kote doktè ta pral mande poul kanpe aktivite a pandan 3 mwa. Se konsa li pral kòmanse imajine tèt li kap chante nan djaz. 《Mwen te toujou renmen Cubano, Jordannie, Ti Manno》, ansyen chantè Nu-Look la fe konnen.

Se konsa li ta pral lansel nan mizik nan ane 90 yo avèk yon albòm solo, ki te rele <<Ann fèl a 2>>. Plizyè ane pita, li ta pral rive nan Zenglen e se separasyonl ak jazz sa poul antre nan D-zine ki ta pral lakoz yon polemik ant li menm ak Garcia Delva, yon lòt gwo chantè sipèsta ke mizik la konnen.
《Youn nan bagay mwen regrèt se yon blag ke mwen te fè nan yon mizik nwèl kote mwen di wa pran konkòd la paske UPS ak FedEx pa delivre, sa ki ta pral pouse Garcia fe eksè poul vwayaje malgre li pat gen papye pou jiskaske li depòte》, ansyen chantè D-zine la fè konnen.

Gazzman te tou pwofite pale de gwo kolaborasyon ke li fè ak anpil lòt pwodiktè tankou Richie, Shedly Abraham, Richard Cavé poun site sa yo sèlman. Sou yon kesyon ke Rigolo, animatè Pi lwen ke zye a, ki te prezan nan emisyon an te mande ki posiblite pou yon lòt kolaborasyon ak ansyen mayestwo li Arly, chantè vedèt la deklare ke 《Mpa panse li nesesè, ann kitel mache》

Li deklare tou ke pasaj li nan D-zine ak Nulook, pa gen okenn chantè ki ka depasel nan sa li reyalize avèk Djaz sa yo. Jodi a Gazzman nan Disip. Jazz ke li te kreye depi 2010 lè li te deside kite Nu-Look. Yon kòmansman ki te make ak yon efori san parèy. 14 lane aprè se 4 albums : Mission (2010); Viktwa (2013); Klere yo (2016) ak Loreya (2019).

Jude Bregard
Konpaevents