Leicka Paul, Yon Reyon Nan Solèy MizikalAayisyen an !

Depi kèk tan, medam yo pa sispann make pwen seryezman nan endistri mizikal ayisyèn nan. Malgre tout kalite baryè ki drese devan yo, yo kontinye goumen san kanpe pou yo franchi tout obstak pou yo pote kontribisyon pa yo nan biznis mizik la. Li pa diferan pou Leicka Paul kap lite lontan pou l entegre kòm sa dwa sektè sa .

Menm jan ak anpil lòt atis, Leicka Paul ap chante depi tou piti nan legliz. Malgre tout difikilte li rankontre sou chimen sa a, li deside li pap bay vag. Fòk li antre nan endistri mizikal ayisyèn nan e fòk li goumen tou pou l vin ak yon melanj zouk ak konpa.

Pandan li ta pral lekòl pou l ka vin yon enfimyè pou paran l sitou, li pa t sispann karese rèv li, pasyon li ki se chante. Lè l fin diplome nan enfimyè a, li lage l lib e libè nan sa li renmen tout bon an. Jounen jodi a, atis la gen plizyè mizik ak kolaborasyon nan aktif li tankou: “Ou kapte mwen”, “Lanmou prive” ak Roody Delpe, “Ak tout defo w” ak Blaze one, “Lè w pa la” ak Dj Jackson, “Mi amor” ak Thierry Cham…e kounye a Leicka fenk pote adaptasyon mizik “Pa fè mwen la penn” nan ak Roberto Martino (Vice 2k), mizik klasik Eric Virgal.

Leicka pa kache lakontantman I pou jan chantè Vice la te akeyi pwojè a san difikilte. Ou ka santi santiman fyète ak satisfaksyon ki anvayi atis la pou travay sa a. Daprè sa li di linivè avè l. Santiman fyète sa pa sèlman pou Toto men tou li pou nouvo manadjè li Zagalo ki se yon konnen nan domèn nan. << Zagalo kwè nan talan m e mwen kwè nan li kòm yon moun ki ka vann mwen, 100% mwen lage m nan men Zagalo>>, se konsa Leicka tap pale ak yon konfyans san parèy de manadjè li. Yon maryaj ant yon bèl chantèz chaje talan tankou Leicka ak yon Roberto nan adaptasyon sa a ta dwe pote kichòy pou konsène yo.

Chimen siksè toujou gen monte desann. Sa ki enpòtan, se travay san kanpe jouk ou rive jwenn sa wap chèche a. Leicka te konnen pou l pa adrese pèsòn san li pa gen anyen nan men l. Chak moun li apwoche te toujou poze l menm kesyon an “ kisa w gen nan djakout ou?”. Lè wap bouske fòk ou pare! Se konsèy pou tout jèn kap goumen pou entegre endistri mizikal ayisyèn nan ak nenpòt lòt sektè. Nou swete siksè mache kontre Leicka Paul yon fason pou rekonpanse tout jefò li konsanti pou l fè sa lap goumen pou li a depi byen lontan.

Gbsainthubin@gmail.com
Konpaevents